Kontrast - Fiskahúsið úti á Gjógv

Fiskahúsið úti á Gjógv

Vinna & Samferðsla

Stovuhædd - hædd 01 og 01.5

Høvuðsinngongdin til bygningin liggur á hædd 01, og er staðsett í øðrum endanum av glasgongdini. Frá glasgongdini er bæði atgongd til Fiskastykkið og Fiskahúsið. Á hæddini liggur vørumóttøka, ruskrúm, borðreiðingarkøkur og eitt veitsluhøli. Frá veistluhølunum er atgongd út á eina sveimandi altan við glasgólvi - her er gott útsýni niður á stabbagrótið í gjónni umframt út á havið. Inni í veitsluhølunum eru tær gomlu turkirammurnar hongdar uppá veggin fyri at vísa á gamla virksemi í bygninginum. Hædd 01.5 liggur eina hálva hædd longri uppi. Her er eitt forrúm, umframt atgongd út til stóru terassuna, har møguleiki er fyri at njóta útsýni og ljóðið frá sjónum, ið brestur inn í gjónna.

1. hædd - hædd 02

Á ovastu hædd eru tey gomlu turkirúmini og eitt stórt veitsluhøli. Gomlu hurðarnar og radiatorarnir í turkirúmunum eru varðveitt, og nýggjar glashurðar verða settar í hurðaopini fyri at gera tað møguligt at brúka rúmini sum minni fundarhøli. Radiatorarnir eru staðsettir ímillum hvørt turkirúm - glasskjótihurðar eru ímillum hvørt rúmið, soleiðis at tilber at opna upp ímillum rúmini, um øll hæddin skal nýtast sum eitt stórt veistluhøli. Frá turkirúmi nr. 3 er beinleiðis atgongd út í glasgongdina, og víðari yvir í Fiskastykkið.

Hæddirnar og trapputornið

Virksemið í Fiskahúsinum strekkir seg yvir tríggjar høvuðshæddir (00, 01 og 02) og tvær innskotnar hæddir (00.5 og 01.5). Eitt trapputorn, sum liggur út ímóti gjónni, bindir saman allar hæddirnar. Á myndini sæst trapputornið, terassan og altanin, og hvussu allir tríggir bygningarnir byggja seg inn í hvønn annan og blíva partur at gjónni.